Mkuu wa Mkoa wa Morogoro Mhe. Adam Malima, amepongeza Tume ya Kurekebisha Sheria Tanzania kwa kuendelea kutoa Elimu ya Sheria kwa wananchi ili kuwajengea uelewa wa masuala ya kisheria.

Mhe. Malima ametoa pongezi hizo tarehe  28 Novemba 2025 alipotembelea banda la Tume katika Maonesho ya kibiashara yaliyoratibiwa na Chemba ya Biashara, Viwanda na Kilimo Tanzania (TCCIA)  yanayofanyika katika Uwanja wa Jamhuri mkoani Morogoro.

Akiwa katika banda la Tume ya kurekebisha Sheria Tanzania Mhe. Malima alisema anafurahishwa na juhudi za utoaji Elimu ya Sheria kwa wananchi  hasa ya kutumia machapisho mbalimbali ikiwemo vipeperushi na kueleza kuwa aina hiyo ya uelimishaji inasaidia kuwafikia wananchi wengi zaidi kwa kuwa  wanaweza kujisomea hata wanapokua wenyewe na kujifunza masuala ya kisheria.

Aidha kutokana na umuhimu huo Mhe. Malima alihimiza Tume kuhakikisha wanaunda Vipeperushi vingi zaidi vinavyozungumzia changamoto za Wananchi na utatuzi wake ili kuongeza wigo wa uelimishaji kwa wananchi.

“Hongereni sana Tume, hiii ya vipeperushi nimeipenda sana hakikisheni mnaviandaa kwa wingi na vinavyogusa changamoto za Wananchi na utatuzi wake kisheria” alisema Mhe. Malima.

Awali Afisa Sheria wa Tume ya Kurekebisha Sheria Tanzania, Jackline Nungu alieleza kuhusu namna Tume hiyo inavyotekeleza majukumu yake ambapo alieleza miongoni mwa majukumu kuwa ni pamoja na utoaji wa Elimu ya Sheria kwa Umma ambayo hutumia njia mbali mbali ikiwamo kupitia makongamano, warsha, machapisho , ushiriki wa maonesho mbalimbali pamoja na kufanya vikao vya wadau wa makundi mbalimbali kuwaelimisha kuhusu masuala ya kisheria.

Tume ya Kurekebisha Sheria inashiriki Maonesho ya kibiashara mkoani Morogoro yaliyoanza tarehe 20 Novemba 2025 na yatahitimishwa tarehe 30 Novemba 2025 ili kutoa Elimu ya Sheria kwa Umma  kwa lengo la kuwajengea wananchi uelewa wa kisheria katika masuala mbalimbali.