Naibu Katibu Mtendaji  Tume ya Kurekebisha Sheria Tanzania, Bi. Zainab Chanzi, leo tarehe 09/07/2025 amesema Tume inaendelea kufanya utafiti kuhusu matumizi ya Akili Mnemba (Artificial Intelligence – AI) ili kuweka msingi wa maboresho ya sheria yatakayowezesha Tanzania kujenga uchumi wa kidijitali, ikiwa ni sehemu ya utekelezaji wa Dira ya Taifa ya Maendeleo 2050.

Bi. Chanzi alisema maendeleo ya teknolojia yamebadilisha namna dunia inavyoendesha biashara, utoaji wa huduma na ubunifu, hivyo ni muhimu mfumo wa sheria nchini ukaendana na mabadiliko hayo ili kuifanya Tanzania inufaike na mapinduzi ya kidijitali yanayoendelea duniani.

Alisema utafiti unaofanywa na Tume unalenga kubaini maeneo yanayohitaji maboresho ya sheria na sera ili kuweka mazingira salama na wezeshi kwa matumizi ya Akili Mnemba katika sekta mbalimbali, ikiwemo biashara, afya, elimu, kilimo, huduma za kifedha na utawala wa umma.

"Uchumi wa kidijitali ni moja ya maeneo yaliyopewa kipaumbele katika Dira ya Taifa ya Maendeleo 2050. Ili kufikia malengo hayo, ni lazima tuhakikishe kuwa sheria zetu zinaendana na kasi ya maendeleo ya teknolojia na zinatoa mwongozo unaowezesha ubunifu huku zikilinda maslahi ya wananchi na Taifa," alisema Bi. Chanzi.

Aliongeza kuwa matumizi ya AI yanaendelea kukua duniani, jambo linalohitaji kuwepo kwa mfumo wa kisheria unaoshughulikia masuala ya faragha ya taarifa, usalama wa mifumo ya kidijitali, uwajibikaji katika matumizi ya teknolojia, haki miliki na maadili ya matumizi ya akili bandia.

Kwa mujibu wa Bi. Chanzi, Tume itaendelea kushirikisha taasisi za umma na binafsi, wataalamu wa teknolojia, vyuo vikuu, sekta binafsi na wadau wengine katika kukusanya maoni yatakayosaidia kuandaa mapendekezo ya maboresho ya sheria yanayokidhi mahitaji ya sasa na ya baadaye.

Alisema hatua hiyo inalenga kuhakikisha Tanzania inakuwa na mfumo wa sheria unaovutia uwekezaji katika sekta ya teknolojia, unachochea ubunifu wa vijana na kuongeza ushindani wa nchi katika uchumi wa kidijitali wa kikanda na kimataifa.

Bi. Chanzi alisisitiza kuwa Tume itaendelea kufanya tafiti za kina kuhusu teknolojia zinazoibuka ili kuhakikisha sheria za Tanzania zinaendana na mabadiliko ya dunia na kuchangia kikamilifu utekelezaji wa Dira ya Taifa ya Maendeleo 2050.